កំពង់ឆ្នាំង ៖ សាលាដំបូងខេត្តកំពង់ឆ្នាំង នៅរសៀលថ្ងៃទី២៦ ខែតុលា ឆ្នាំ២០២៣នេះ បានសម្រេចឃុំខ្លួនជនជាតិវៀតណាមចំនួន២នាក់ ដែលធ្វើសកម្មភាពកា.ប់ដើមឈើព្រៃលិចទឹកធំៗអស់ជាច្រើនដើម នៅចំណុចព្រែកថ្លាន់ ស្ថិតក្នុងភូមិដំណាក់រាជ្យ ឃុំកំពង់ព្រះគគី ស្រុកបរិបូណ៌ ដែលត្រូវបានមន្ត្រីជំនាញជលផលនៃមន្ទីរកសិកម្មខេត្តកំពង់ឆ្នាំង ធ្វើការឃាត់ខ្លួនបានកាលពីយប់ថ្ងៃទី២៤ ខែតុលា ឆ្នាំ២០២៣។
លោក តាត សីហាក់ នាយផ្នែករដ្ឋបាលជលផលកំពង់ឆ្នាំង បានឲ្យដឹងថា កាលពីវេលាម៉ោងប្រម៉ាណ៨យប់ ថ្ងៃទី២៤ ខែតុលា ឆ្នាំ២០២៣ មានសេចក្តីរាយការណ៍ពីប្រជាពលរដ្ឋស្តីពីសកម្មភាពជនជាតិវៀតណាមទាំង២នាក់នាំគ្នាកា.ប់ដើមឈើធំៗ ដែលជាព្រៃលិចទឹក ដោយបានបណ្ដែតជាមួយនឹងប៊ីដុងជ័រចំណុះ៣០លីត្ររាប់សិបពីដុង រួចប្រើកាណូតអូសចេញ បំរុងយកទៅធ្វើជាសម្រាស់ដាក់ត្រី។នាយផ្នែករដ្ឋបាលជលផលកំពង់ឆ្នាំង បានឲ្យដឹងបន្តថា ពេលនោះ កម្លាំងផ្នែករដ្ឋបាលជលផលរបស់លោក ក៏បានចុះទៅដល់កន្លែងកើតហេតុភ្លាមៗដែរ ហើយធ្វើការឃាត់ខ្លួនជនល្មើសជាជនជាតិវៀតណាមទាំង២នាក់ដែលប្រព្រឹត្តបទជាក់ស្តែង។ ជនល្មើសទាំង២នាក់នេះមាន ៖ ១- ឈ្មោះ វៀង យាំងទឺ អាយុ៤៧ឆ្នាំ និង២- ឈ្មោះ ដែន យាំងសង អាយុ៤៦ឆ្នាំ ទាំង២នាក់នេះរស់នៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ប៉ុន្តែមកស្នាក់នៅភូមិក្រម៉ាល់ ឃុំប្រឡាយមាស ស្រុកកំពង់លែង ។នាយផ្នែករដ្ឋបាលជលផលកំពង់ឆ្នាំង បានឲ្យដឹងបន្តទៀតថា ចំពោះវត្ថុតាងដែលរឹបអូសបានរួមមាន ៖ កាណូតចំនួន៣គ្រឿង ក្នុងនោះ២គ្រឿងជាកាណូតឈើ និង១គ្រឿងទៀតជាកាណូតបាឡាស្មាច់, ដើមឈើធំៗចំនួន១៥ដើម និងប៊ីដុងជ័រចំណុះ៣០លីតរាប់សិបពីដុងទៀតផង។តាមប្រភពពីមន្ត្រីតុលាការអមសាលាដំបូងខេត្តកំពង់ឆ្នាំង បានប្រាប់ឲ្យដឹងដែរថា ជនល្មើសទាំង២នាក់នេះ ត្រូវចោទប្រកាន់ពីបទ «កា.ប់ដាក់រំលំដើមឈើព្រៃលិចទឹក ក្នុងដែនអភិរក្សមេពូត្រី» ហើយត្រូវបានចៅក្រមសម្រេចឃុំខ្លួនក្នុងសំណុំរឿងលេខ ១១០៦ និងលេខ១១០៧ (២នាក់ ២សំណុំរឿង) តាមច្បាប់ស្ដីពីជលផល។ ហើយចំពោះ វត្ថុតាងវិញ ត្រូវបានរឹបអូសជាសម្បត្តិរដ្ឋ ៕










