ស្ទឹងត្រែង៖ លោក ឡន វណ្ណា អ្នករាយការណ៍ព័ត៌មានទូរទស្សន៍ ភីអិនអិន (PNN) ប្រចាំខេត្តស្ទឹងត្រែង បានទទួលមរណៈភាពហើយ កាលពីវេលាម៉ោង ៩យប់ថ្ងៃទី២៤ ខែមីនា ឆ្នាំ២០២៣នេះ នៅគេហដ្ឋាន ស្ថិតក្នុងខេត្តស្ទឹងត្រែង ។
គួររំលឹកថា មុនពេលកើតហេតុ លោក ឡន វណ្ណា និងក្រុមគ្រួសារបានទៅសម្រាកនៅផ្ទះចម្ការ ស្ថិតនៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគីរី មុនពេលព្រះអាទិត្យអស្ដង្គត (ថ្ងៃលិច) លោកបានដើរថតទេសភាពជុំវិញដី និងដើរថតវីដេអូសែលហ្វី នៅក្នុងបរិវេណដីចម្ការចាស់អ្នកជិតខាង នៅក្បែរផ្ទះចម្ការរបស់លោក ដោយមិននឹកស្មាន ហើយក៏បាំងស្មៅមើលពុំឃើញ លោកក៏បានធ្លាក់ចូលក្នុងរណ្តៅអណ្តូងដោយចៃដន្យ មួយកន្លែងពុំមានទឹក ដែលមានជម្រៅប្រហែល៣០ ទៅ៤០ម៉ែត្រ បណ្តាលអោយរងរបួសធ្ងន់ធ្ងរ ។តាមប្រភពព័ត៌មានបានឲ្យដឹងថា នៅពេលធ្លាក់ចូលក្នុងអណ្តូងនោះ លោកព្យាយាមចុចទូរសព្ទមកប្រពន្ធដែរ ប៉ុន្តែបាត់មិនឮនិយាយ ទើបក្រុមគ្រួសារមានការសង្ស័យ ក៏នាំគ្នាតាមរក ខណៈពេលដើររកបណ្តើរ ចុចទូរសព្ទបណ្តើរ ក៏ឮសំឡេងល្វើយៗ ចេញពីក្នុងអណ្តូង ហើយក៏រាយការណ៍ជូនដល់សមត្ថកិច្ច មកធ្វើអន្តរាគមន៍ភ្លាមៗផងដែរ ។លោក ឡន វណ្ណា ត្រូវបានកម្លាំងនគរបាលក្រុងសែនមនោរម្យ និងមិត្តភក្តិជាអ្នកសារព័ត៌មានជាច្រើននាក់ បានជួយសង្គ្រោះភ្លាមៗ ដោយបានបញ្ជូនទៅមន្ទីរពេទ្យបង្អែកខេត្តមណ្ឌលគិរី តែដោយសារស្ថានភាពធ្ងន់ធ្ងរ ក្រុមគ្រូពេទ្យបានបញ្ជូនបន្តទៅសង្គ្រោះបន្តដល់មន្ទីរពេទ្យប្រទេសវៀតណាម តែដោយស្ថានភាពធ្ងន់ធ្ងរពេក ក៍ស្លាប់បាត់បង់ជីវិត តែម្តង៕




